Na aula de 6º A, rapazas e rapaces tiveron que preparar un menú saudable para un día tendo en conta que se recomenda realizar cinco comidas ao día.
Nas clases de Ciencias Naturais estamos a tratar o tema da alimentación e a importancia de ter unha dieta equilibrada na que incorporemos todos os nutrientes necesarios para conseguir enerxía e manternos sans: froitas e verduras, evitar consumo de graxas saturadas, peixes e carnes...
Tendo en conta todos estes aspectos, de xeito individual elaboraron o seu menú e agora témolo exposto na nosa aula.
Non houbo mellor maneira de dar comezo ás entradas deste curso no noso blogue do proxecta Aliménta-t Ben que a Andaina que nos marcamos os alumnos, alumnas e mestres de 6º de Primaria no Día Mundial da Alimentación (16 de outubro)
O martes pola mañá os rapaces e rapazas de 6º e máis os seus mestres Ismael, Ángeles, Naza e Cris, puxemos rumbo á III Andaina do Camiño de Inverno, organizada pola Asociación de Amigos do Camiño de Santiago pola Ribeira Sacra.
O percorrido tivo unha lonxitude de 5, 5 km aproximadamente, nas que existiu certa dificultade polas pendentes de subida e baixada e polos tramos de terreos de barro que nos fomos atopando, que os nosos rapaces e rapazas foron sorteando con éxito.
Partimos da igrexa de San Paio de Diomondi, na zona de O Saviñao e rematamos en San Pedro de Líncora (Chantada). Paramos a facer un descanso na Adega "Vía Romana", onde tomamos un tentempé: auga, mazá e chocolatina.
O tramo realizado correspóndese coa etapa de Monforte de Lemos a Chantada.
Ademáis das fotos que presentamos a continuación, quedarán no noso recordo e deixarán pegadas, as fermosas paisaxes vistas, o valor do esforzo, a importancia do deporte e a boa alimentación que inflúe no noso rendemento, as risas cos amigos, a axuda nas dificultades, ó compartir experiencias con coñecidos e descoñecidos, a confianza nas nosas posibilidades " se queres, podes", os olores, sons e cores da natureza...
